Խնամակալ Մարմնի Խօսք

1985-ին, խումբ մը ազգայիններ, իրենց նուիրատուութիւններով հաստատեցին հիմնադրամ մը, ՀՕՄ-ի Գոլոլեան Նախակրթարանի եւ Պապայեան մանկապարտէզի նիւթական կարիքները մնայուն կերպով հոգալու նպատակով։ Հիմնադրամի շահարկումէն գոյացած գումարները, ամէն տարի փոխանցուեցան դպրոցին։

Այս յաջող քայլէն քաջալերուած, Հայ Կեդրոնի Վարչութիւնը որոշեց ընդարձակել հիմնադրամի նպատակները եւ վարժարանի կարիքներուն կողքին օգնել նաեւ այլ հայկական կազմակերպութիւններու։ Յարմար նկատուեցաւ նաեւ որ այս հիմնադրամին միջոցաւ, նուիրատուները կարենան որոշել թէ որ կազմակերպութիւնները պիտի նպաստ ստանան  նուիրատուութիւններու հասոյթներէն։

Այսպէս, 1997-ին ծնունդ առաւ Գանատահայ Հիմնադրամը։ Ցարդ, անոր դրամագլուխը անցած է 12.5 միլիոն տոլարը, եւ անոր տարեկան հասոյթը՝ շուրջ $450,000 կը փոխանցուի զանազան կազմակերպութիւններու: Վստահ ենք որ ապագային այս հիմնադրամը պիտի կրկնապատկուի եւ եռապատկուի։

Լաւատեսութեամբ է որ ձեզի կը ներկայացնենք մեր նպատակներն ու երազները։ Միասնաբար կրնանք մեր կազմակերպութիւններուն ապագան նիւթական ամուր հիմերու վրայ դնել։

Կը հրաւիրենք ձեզ անդամակցելու ԳՀ-ին, անոր միջոցաւ նպաստելու ձեր նախընտրած նպատակներուն եւ գործոն մասնակցութիւն ունենալու այս գաղութին բարգաւաճ ապագան ապահուելու հեռանկարին: